SÖÝMÜŞEM SENI
Ýa Habyby-Hak Resul sen,
Çyn jandan söýmüşem seni.
Derwüşler gadyr gijesin,
Söýen dek söýmüşem seni.
Eýleýip seýli-seýrany,
Keşt edip külli Eýrany,
Misli Ybrahym Sarany
Söýen dek söýmüşem seni.
Ýakup ýurt etdi Kengany,
Ogly Müsüriň soltany,
Aşyk Ýusup Züleýhany
Söýen dek söýmüşem seni.
Ýalançyny tutdy ady,
Olardyr yşkyň binýady,
Mežnun Leýli perizady,
Söýen dek söýmüşem seni.
Dildiler dagyň zirini,
Tapmadylar bir-birini,
Aşyk Perhat gül Şirini,
Söýen dek söýmüşem seni.
Etdi meni dünýä pany,
Bolmady yşkyň kemaly,
Seýpelmelek Mahjemaly
Söýen dek söýmüşem seni.
Bakdy muhubbet nyşany,
Keşt eýledi çar köşäni,
Ýemende Warka Gülşany
Söýen dek söýmüşem seni
Gitdi elden ygtyýary,
Galmady namysy-ary,
Aşyk Nowruz gül Perhary
Söýen dek söýmüşem seni.
Gezdiler Rumuň düzüni,
Berdiler Hakyň karzyny,
Aryzda Ganbar Arzyny
Söýen dek söýmüşem seni.
Tutmady olar dünýäni,
Galmady ýary-ýarany,
Misli ol Tahyr Zöhräni
Söýen dek söýmüşem seni.
Bu dünýä goýupdyr kimi?
Hoş tutup bäş günlük demi,
Aşyk garyp Şasenemi
Söýen dek söýmüşem seni.
Magtymguly, dünýä pany,
Ötüpdir, Rüstem Zal kany?
Aý güni, zemin asmany
Söýen dek söýmüşem seni.
ÝAR BIZIM SARY
Gulzumy gyr sanyp, kyrk ýol geçer men,
Eger ki meýl etse ýar bizim sary;
Gadam ýerne ganat baglap uçar men,
Diýse dilber: “Aşyk, ýör bizim sary”.
Kyrk ýyl gol gowşuryp, gullukda dursam,
Alty günçe görmen, altmyş ýyl ýörsem,
Bir şunçakly bolsa, görsem, jan bersem,
Jemalyn arz etse bir bizim sary.
Ne laýykly ýüzüm bardyr tutarga,
Ne aýry gapym bar andan giterge.
Umydym bar goýmaý bela-beterge,
Dergahyndan açsa der bizim sary…
Bir kimse ýolukdy desti şeraply,
Ýelden jaýnamazly, suwdan mähraply,
Egni ak redaly, ýaşyl nikaply,
Ugraşdy bir ajap är bizim sary.
Ýoldaş bolup bile ýördüm bir meýdan,
Meýdan içre dolup oturmyş merdan,
Bir eýwan üstünde çyrlap tört ýaran,
Diýdiler: “Goluňny ber bizim sary!”.
“Pyragy” diýp çagyrdylar, eltdiler,
“Kandadyň?” diýp, gulagymdan tutdular,
Istihanym altmyş para etdiler,
Diýdiler: “Mert olsaň, dur bizim sary!”
Magtymguly, bäş gün äşret sürmäge,
Jaý imesdir eglenmäge, durmaga,
Kararym ýok, otumaga, turmaga,
Agzyn açyp durmuş ýer bizim sary.
